Fáilte chuig FSS an Iarthair Láir

Tá an meascán is fearr i Réigiún an Iarthair Láir de dheiseanna gairme beatha, de phobail bheoga, agus de shárchaighdeán beatha. Is cuma más ag dul sa tóir ar phost sásúil i gcúram sláinte nó ar thús úrnua i réigiún ina gcothaítear cothromaíocht oibre is saoil atá tú, tiocfaidh tú air anseo.

Tá Aillte an Mhothair, atá ar Liosta Oidhreachta Domhanda UNESCO, Geopháirc Bhoirne fhíorálainn, agus imeallbhord dochreidte an Atlantaigh san Iarthar Láir agus is ann atá cuid de na hiontais nádúrtha is aitheanta in Éirinn. Tá iliomad deiseanna ar fáil sa réigiún freisin le haghaidh eachtraíocht taobh amuigh, idir shiúlóidí scéimhe agus spóirt uisce agus rothaíocht ar Ghlasbhealach Luimnigh 40 ciliméadar.

Ach tá níos mó ná an dúlra ann – réigiún é seo atá líon lán le fuinneamh agus le cultúr. Mol uirbeach faoi rath í Cathair Luimnigh i gceartlár an Iarthair Láir, agus tá bailte bríomhara na hInse, an Leachta agus an Aonaigh suite i ngar. Tiocfaidh tú ar gach rud anseo – na healaíona agus an ceol, scoth an bhia agus meanma fháilteach phobail.

Cliffs of Moher

Cé muid féin

Cuireann FSS an Iarthair Láir seirbhísí sláinte agus cúraim shóisialta ar fáil ar fud an Chláir, Luimnigh agus Thiobraid Árann Thuaidh, ina gcuirtear deiseanna tairbheacha gairme beatha ar fáil i suíomhanna éagsúla – seirbhísí pobail, ospidéil ghéarmhíochaine agus an earnáil dheonach.

Cinntíonn ár seirbhísí cúraim sláinte pobail go dtugtar an cúram ceart do dhaoine san áit cheart, ag an am ceart agus ag an bhfoireann cheart. Tá líonra Ionaid Chúraim Phríomhúil agus foirne tiomnaithe ann sa mheabhairshláinte, sláinte agus folláine, cúram sóisialta agus i seirbhísí míchumais, agus cuirimid cúram bunriachtanach ar fáil i suíomhanna éagsúla, cosúil le háiteanna cónaithe daoine, ospidéil lae, aonaid altranais pobail, brúnna, cúram faoisimh agus seirbhísí cónaithe.

Tá sé ospidéal géarmhíochaine inár réigiún, ina gcuirtear réimse iomlán seirbhísí ar fáil, cúram éigeandála agus sceidealaithe, cúram othar cónaitheach, seirbhísí máithreachais, clinicí othar seachtrach, diagnóisic agus sainchóireálacha ina measc. Le tuilleadh eolais a fháil ar á n-ospidéil, cliceáil anseo.

Táimid tiomanta don sármhaitheas i gcúram sláinte trí thaighde, oideachas agus nuálaíocht leanúnach. Cinntíonn ár gcomhoibriú le hOllscoil Luimnigh agus leis an Acadamh Eolaíochtaí Sláinte ag Ospidéal Ollscoile Luimnigh (UHL) go mbíonn teacht ag ár bhfoireann ar oiliúint cheannródaíoch, ar fhorbairt ghairmiúil agus ar dheiseanna chun dul chun cinn a dhéanamh ina ngairmeacha beatha.

Caith súil ar ár ngné ‘Spotsolas ar Réigiúin’, atá tiomnaithe d’Ospidéal Ollscoile Luimnigh

University Hospital Limerick staff

Ealaíona agus cultúr

Níl ort rogha a dhéanamh idir an ghairm bheatha a theastaíonn uait agus caighdeán na beatha má chónaíonn tú san Iarthar Láir – is féidir leat an dá rud a bheith agat.

Idir bheocht shaol na cathrach agus mheanma phobail na mbailte agus na sráidbhailte, cuirtear láthair shaibhir chultúrtha agus shóisialta ar fáil san Iarthar Láir. Mol cruthaitheach agus cultúrtha í Cathair Luimnigh ina bhfuil amharclanna, músaeim, féilte agus ionaid cheoil bheo. Tá scoth cheoltóirí, ealaíontóirí agus thaibheoirí na hÉireann sa réigiún freisin, a chinntíonn go mbíonn rud éigin ag titim amach i gcónaí.

Má tá tú paiseanta faoin spórt, tá tú san áit cheart. Tá an iománaíocht agus an rugbaí i gceartlár ár bpobal, agus imríonn laochra áitiúla le foirne buaiteacha na Mumhan agus Uile-Éireann. Is cuma más maith leat féachaint ar chluichí, cluichí a imirt, nó páirt a ghlacadh i measc an ghnáthphobail, níl aon ghanntanas deiseanna ann.

Munster Rugby

Nascacht

Tá an tIarthar Láir ar cheann de na réigiúin is ceangailte in Éirinn, a dhéanann éasca ort é cónaí, obair agus taisteal ann.

  • Cuirtear eitiltí díreacha ar fáil ó Aerfort na Sionainne go dtí na Stáit Aontaithe, an Ríocht Aontaithe agus an Eoraip, chomh maith le réamh-imréiteach áisiúil do phaisinéirí atá ag taisteal go dtí na Stáit Aontaithe.
  • Déanann naisc thapa iarnróid Cathair Luimnigh a nascadh le Baile Átha Cliath, Corcaigh, Gaillimh, agus Port Láirge.
  • Tá mótarbhealaí go Baile Átha Cliath agus Gaillimh sa ghréasán forleathan bóithre atá sa réigiún, a chinntíonn taisteal tapa agus gan stró.
  • Ceanglaíonn seirbhísí cuimsitheacha bus na bailte agus na sráidbhailte atá ar fud an réigiúin.
Limerick
Cliceáil anseo chun clárú le haghaidh foláirimh fostaíochta