Conas a bhainfidh mé cáilíocht amach mar Shíceolaí?

Is í an tsíceolaíocht an staidéar eolaíoch ar iompar an duine. Tá trí réimse speisialtóireachta in FSS: Síceolaíocht Chliniciúil, Síceolaíocht an Oideachais agus Comhairleoireacht.

Tá roinnt bealaí iontrála ann don tSíceolaíocht mar ghairm:

  • Bunchéim 2:1 sa tSíceolaíocht móide dochtúireacht nó a chomhionann i do réimse speisialtóireachta roghnaithe ó chúrsa creidiúnaithe
  • Bunchéim i gcúrsa tiontaithe móide dochtúireacht nó a chomhionann i do réimse speisialtóireachta roghnaithe ó chúrsa creidiúnaithe

Soláthraíonn FSS clár oiliúna gairmiúla iarchéime creidiúnaithe 3 bliana d’Oiliúnaithe sa tSíceolaíocht i réimse na Comhairleoireachta, Shíceolaíocht an Oideachais nó na Síceolaíochta Cliniciúla, i gcomhpháirtíocht idir FSS agus ollscoileanna áirithe in Éirinn.

Cuireann Cumann Síceolaíochta na hÉireann (PSI), an comhlacht gairmiúil don tsíceolaíocht, tuilleadh eolais ar fáil faoi chúrsaí creidiúnaithe, cáilíocht a bhaint amach thar lear agus podchraoladh maidir le cáiliú mar Shíceolaí.

Do ról le FSS

Disciplín fhairsing í an tsíceolaíocht ina ndírítear ar staidéar eolaíochta a dhéanamh ar an duine ó pheirspictíocht iompraíochta, mhothúchánach, síceolaíochta agus sláinte. Oibríonn síceolaithe i suíomhanna cúram sláinte éagsúla in ospidéil agus i suíomhanna pobail araon.

Mar shíceolaí, oibreoidh tú le húsáideoirí seirbhíse a bhfuil dúshláin éagsúla acu ó gach cúlra agus réimse saoil. Ag brath ar an réimse síceolaíochta ina bhfuil tú speisialaithe, d’fhéadfadh sé seo cabhrú le cliaint le:

  • dúlagar, imní, neamhord éigníoch dúghabhálach (OCD), nó fadhbanna itheacháin
  • míchumais fhisiciúla, céadfacha nó intleachtúla
  • saincheisteanna néarfhorbartha amhail NHEA nó an t-uathachas
  • bainistiú fadhbanna saoil amhail tráma nó cailliúint

Mar shíceolaí ba chóir duit a bheith báúil agus neamhbhreithiúnach. Tá scileanna maithe cumarsáide agus idirphearsanta, go háirithe éisteacht ghníomhach, riachtanach chun caidreamh teiripeach láidir a thógáil le d’úsáideoir seirbhíse.

Dul chun cinn gairme

Mar a tharlaíonn i gcás gach gairme in FSS, tá deiseanna iontacha ann chun dul chun cinn gairme a dhéanamh. Tá forbairt ghairmiúil leanúnach ar fáil, spreagtar í agus tacaítear léi.

Conair Chliniciúil:

  • Síceolaí (Cliniciúil/Oideachais/Comhairleoireachta)
  • Síceolaí Sinsearach (Cliniciúil/Oideachais/Comhairleoireachta)
  • Príomhshíceolaí (Speisialtóir)

Conair na bainistíochta:

  • Príomhshíceolaí (Bainisteoir)
  • Stiúrthóir na Síceolaíochta

Oiliúint agus forbairt bhreise

Tá Oifig na nGairmithe Sláinte agus Cúraim Shóisialta freagrach as Ceannaireacht, Oideachas agus Forbairt Ghairmiúil Leanúnach na GSCSanna atá ag obair in FSS.

Is tairseach é HSeLanD a chuireann meascán de dheiseanna oiliúna agus forbartha ar fáil ar líne nó i dtimpeallacht i stíl an tseomra ranga. Is féidir eolas a fháil maidir le hOideachas agus Forbairt ar Thairseach GSCS ar www.hseland.ie.

Tá Forbairt Ghairmiúil Leanúnach (FGL) ar cheann de na príomh-mheicníochtaí chun eolas agus scileanna gairmiúla GSCSanna a chothabháil.

Samplaí eile de ghníomhaíochtaí forbartha gairmiúla ná deiseanna chun seirbhísí iontacha leabharlainne FSS a úsáid, deiseanna breise oiliúna agus oideachais, deiseanna freastal ar chomhdhálacha, seimineáir ghréasáin agus ceardlanna, próiseas meantóireachta agus maoirseachta, an t-eolas is úire faoin ngairm i nuachtlitreacha speisialaithe, blaganna agus podchraoltaí.

Chun tuilleadh eolais a fháil faoi fhoghlaim agus forbairt, tabhair cuairt ar shuíomh gréasáin an Chumainn Síceolaíochta.

Sochair Foirne agus Teistiméireachtaí

Sochar a bheidh agat agus tú ag obair mar fhostaí in FSS ná go mbeidh tú ag saothrú i ngairm atá fiúntach agus dúshlánach, agus níl ansin ach sochar amháin. Tairgimid pá agus sochair mhealltacha, maoirseacht ghairmiúil, tacaíocht ghairme agus deiseanna forbartha, comhghleacaithe cairdiúla agus caighdeán beatha iontach.

Féach Scálaí pá – Foireann FSS

Beidh teistiméireachtaí ó bhaill foirne againn go luath.